оқ-дәрілерді таңбалау

(Маркировка боеприпасов) (нем. markieren – белгілеу, таңба қою)

бояумен оқ-дәрі элементтеріне (снарядтар, авиабомбалар, ракеталар, торпедалар, инженерлік миналар және т.б.) және олардың сауытына жағылатын шартты белгілер немесе жазулар жүйесі. Белгілермен және ерекшелендіретін бояуларымен бірге О.т. оқ-дәрілерді пайдалану мен олармен жұмыс істеуде ескерілетін сипаттамалары мен олардың қолданысын анықтауға мүмкіндік береді. О.т. тәртібін оқ-дәрімен жабдықтайтын тиісті органдар белгілейді және техникалық құжаттарда көрсетіледі. Қарулы Күштерде О.т. үшін орыс алфавиті, араб және рим цифрлары, өлшеу белгілері (+ немесе –) және жазулар пайдаланылады. Олар Қорғаныс министрлігінің базаларында, арсеналында, өндіріс зауыттарында қара бояумен салынады. Ол өнімнің атын (индекспен, шифрмен немесе таңбамен), жасаған зауыт шифрын, жарғыш зат шифрын, жарылғыштың таңбасын, өнімді жинаған жыл мен база нөмірін көрсетеді. Сонымен қатар О.т. оқ-дәрі түрін сипаттайтын басқа да мәліметтерді бере алады. О. т-ға қосымша ретінде ерекшелендіретін бояулар алынады. Олар тегіс немесе белгілі бір түспен сақина жолақтары ретінде салынады. Үгіт-насихат снарядтары түгел қызыл түске, лафетсынамалық, тәжірибелік және инертті жабдықтағы снарядтар қара түске боялады. Снаряд-тарға салынған сақина түстері: ақ—жарық түсіргіш снарядты, қызыл—өртегіш снарядты, көк—бетон бұзар снарядты білдіреді. Ерекшелендіретін бояулар жарылғыштарға, тұтандыру құралдарына, жарық және белгі беру құралдарына да жағылады.